नेपालको प्रतिष्ठित वाणिज्य बैंकहरूमध्येको एक, एनआईसी एशिया बैंक लिमिटेडले आफ्नो २८ औं वार्षिक साधारण सभा आह्वान गरेको छ।
आगामी जेठ १८ गते सोमबार बस्ने सभाले शेयरधनीहरूका लागि ५० प्रतिशत (१:०.५ को अनुपात) हकप्रद शेयर निष्कासन गर्ने विशेष प्रस्ताव पारित गर्ने मुख्य एजेन्डा तय गरेको छ।
बैंकले दिएको जानकारी अनुसार साधारण सभा जेठ १८ गते सोमबार बिहान ९ बजेदेखि आर्मी अफिसर्स क्लब, भद्रकाली, काठमाडौंमा शुरु हुनेछ।
साधारण सभामा बैंकको हालको चुक्ता पूँजी १४ अर्ब ९१ करोड ७५ लाख ६६ हजार ९२२ रुपैयाँको ५० प्रतिशतले हुन आउने ७ अर्ब ४५ करोड ८७ लाख ८३ हजार ४६१ रुपैयाँ बराबरको हकप्रद शेयर निष्कासन गर्ने प्रस्ताव निर्णयार्थ पेस गरिनेछ। यो हकप्रद निष्कासन भएपछि बैंकको चुक्ता पुँजी र पूँजीगत आधार झन् बलियो हुने विश्वास गरिएको छ।
सभामा हकप्रद शेयरको विशेष प्रस्तावका साथै बैंकको आर्थिक वर्ष २०८१/८२ को संक्षिप्त वार्षिक आर्थिक विवरण, नाफा–नोक्सान हिसाव तथा नगद प्रवाह विवरण लगायतका महत्त्वपूर्ण वित्तीय प्रतिवेदनहरूमाथि छलफल गरी पारित गरिने कार्यक्रम रहेको छ।
